Diamonds and Rust - Tíkallasími, tunglið og tíminn

Joan Baez - Diamonds and Rust

Hún er Venus í skelinni, móðir og meyja, Kelti og frumbyggi, sigld, sveipuð silki. Joan Baez. Ósnertanleg keramik stytta. En þó líka mjúk sem deig. Í sínu frægasta lagi gefur hún ekkert eftir í ísköldum víbrató flutningi, en ásetningurinn er heitari en kvika Merkúríusar. Hún sendir sneið á fyrrverandi elskhuga og um er að ræða Jón Bakan átján tommu með hvílauksolíu. Ermahnappar, eilífðin og ólgan.

Fílalag fékk Rún Ingvarsdóttur með í þessa fílun. Rún, sem er kynningarstjóri með áratuga fjölmiðlareynslu, nam alþjóðafræði við Berkeley Háskóla og bjó í aldingarði eilífðarhippans við San Francisco flóann en þar hún hitti Baez eitt kvöld og fékk musk-lyktina beint í vitin.